अर्घाखाँचीमा बस दुर्घटना, २४ घाइते
सडकदेखि अन्दाजी १० मिटर तल खस्दा बस र मोटर साइकलमा सवार २४ जना घाइते
विश्व दैनिक |
२२ मंसिर, काठमाडौं । अर्घाखाँचीको शितगंगा नगरपालिकामा बस दुर्घटना हुँदा २४ जना घाइते भएका छन्।
शितगंगा नगरपालिका ४ कोप्चेवासमा नरपानीबाट गोरुसिंगेतर्फ जाँदै गरेको भे १ ख.२११८ नम्बरको बसले लु ३० प २५४४ नम्बरको मोटरसाइकललाई ठक्कर दिँई बस अनियन्त्रित भएको हो।
जिल्ला प्रहरी कार्यालय अर्घाखाँचीका प्रहरी निरीक्षक विष्णु पौडेलले सडकदेखि अन्दाजी १० मिटर तल खस्दा बस र मोटर साइकलमा सवार २४ जना घाइते भएको बताए।
गम्भीर घाइते ४ जनालाई प्राथमिक स्वास्थ्य केन्द्र ठाडामा प्राथमिक उपचार गरेर लुम्बिनी प्रादेशिक अस्पतालमा रिफर गरिएको छ।
अन्य घाइतेको प्राथमिक स्वास्थ्य केन्द्र ठाडामा उपचार भइरहेको छ। अधिकांश घाइते बाँके जिल्लाका रहेका छन्।
अर्घाखाँचीका प्रमुख डीएसपी चक्रबहादुर मल्लले बस चालकलाई प्रहरीले नियन्त्रणमा लिएको र घटनाको अनुसन्धान भइरहेको बताए।
