संसदीय समितिको बैठक आह्वानः प्रधानमन्त्रीको चीन भ्रमणबारे छलफल गर्ने

२९ कात्तिक, काठमाडौं । प्रधानमन्त्री केपी शर्मा ओलीको चीन भ्रमणबारे छलफल गर्न प्रतिनिधि सभा अन्तर्गतको अन्तर्राष्ट्रिय सम्बन्ध र पर्यटन समितिले संसदीय समितिको बैठक आह्वान गरेको छ । बैठक सिंहदरबारस्थित समितिको सभाकक्षमा आगामी आइतबार बिहान ११ बजे बस्नेछ ।
समिति सचिवालयका अनुसार प्रधानमन्त्री केपी शर्मा ओलीलाई पनि समितिमा उपस्थित गराउने प्रयास जारी रहेको जनाएको छ । साथै परराष्ट्रमन्त्री आरजु राणालाई पनि बैठकमा बोलाइएको छ ।
प्रधानमन्त्री ओली आगामी मंसिर १७ गते पाँचदिने औपचारिक भ्रमणका लागि चीन जाँदै छन् । प्रधानमन्त्रीको चीन भ्रमणमा बीआरआई कार्यान्वयन योजनामा हस्ताक्षर गर्ने लगायतको तयारी रहेको बताइन्छ ।
बीआरआईलाई लिएर अन्तर्राष्ट्रिय सम्बन्ध समितिमा यसअघि पनि पटक–पटक छलफल भएका छन् । बीआरआई अन्तर्गत ऋण लिन नहुने र हुने दुई थरी मत छ । खासगरी नेपाली कांग्रेसका सांसदहरूले बीआरआई अन्तर्गत ऋण लिन नहुने अनुदानमात्रै लिने नीति सरकारले लिनुपर्नेमा जोड दिँदै आएका छन् ।
नेपालले पोखरा अन्तर्राष्ट्रिय विमानस्थलका लागि लिएको चिनियाँ ऋण मिनाहा होस् भन्नुपर्नेमा भने एमाले र कांग्रेसको मत छ । यी लगायतका विषयमा सरकारले के कस्तो नीति अवलम्बन गर्दैछ भनेर बुझ्न र आवश्यक सुझाव दिन बैठक राखिएको अन्तर्राष्ट्रिय सम्बन्ध र पर्यटन समितिले जनाएको छ ।