पर्सामा आगलागीबाट दर्जन बढी खसीबाख्रा मरे
आगलागीबाट २ लाख ५० हजार रुपैयाँ बराबरको क्षति
विश्व दैनिक |
२ माघ, काठमाडौं । पर्साको जिराभवानी गाउँपालिका–५ स्थित शंकरशरैयामा बाख्रापालक किसानको खोरमा आगलागी भएको छ ।
वडाध्यक्ष दारासिंह राउतले आगलागीबाट स्थानीय लालबहादुर दासका करिब दुई दर्जन खसीबाख्रा मरेको जानकारी दिए ।
चिसोबाट बाख्रालाई बचाउन खोर नजिकै बालेको घुर सल्किएर आगलागी हुँदा २ दर्जन जति खसीबीख्रा मरेको उनले बताए ।
बुधबार बिहानपख १ बजेको समयमा आगलागी भएको हो । आगलागीबाट खोर पूर्णरूपमा जल्दा खोरमा भएका खसीबाख्रा जलेको उनले बताए ।
आगोमा जलेर १० वटा बाख्रा र ८ वटा बोका मरेका जिल्ला प्रहरी कार्यालय पर्साले जानकारी दिएका छन् । आगलागीबाट २ लाख ५० हजार रुपैयाँ बराबरको क्षति भएको छ ।
