चुनकुमारीको हत्या गर्ने श्रीमानसहित ६ जना पक्राउ गर्ने प्रहरीलाई सर्वोत्कृष्ट प्रहरी अवार्ड
दक्षिण कोरियामा बसेर धनकुटाकी चुनकुमारी बुढाथोकीको हत्या गर्ने उनका श्रीमानसहित ६ जना अभियुक्तलाई पक्राउ गरेका उनलाई अवार्ड प्रदान गरिएको हो।
विश्व दैनिक |
इलाका प्रहरी कार्यालय धरानका प्रहरी निरीक्षक दिवस कुँवर सर्वोत्कृष्ट प्रहरी अवार्डबाट पुरस्कृत भएका छन्। दक्षिण कोरियामा बसेर धनकुटाकी चुनकुमारी बुढाथोकीको हत्या गर्ने उनका श्रीमानसहित ६ जना अभियुक्तलाई पक्राउ गरेका उनलाई अवार्ड प्रदान गरिएको हो।
गत चैत २५ गते सुनसरीको धरान उपमहानगरपालिका-६ स्थित पाँचकन्या जंगलमा मृत भेटिएकी धनकुटाको महालक्ष्मी नगरपालिकाकी चुनकुमारी बुढाथोकीको हत्यामा संलग्न दक्षिण कोरियामा रहेका उनका श्रीमान प्रेमबहादुर बुढाथोकी सहितको पहिचान गरी ६ जनालाई पक्राउ गरेका कुँवरलाई शनिबार कोशी प्रदेश प्रहरी कार्यालय विराटनगरले अवार्डबाट पुरस्कृत गरेको हो।
कोरियामा रहेका प्रेमबहादुरको मुख्य योजनामा चुनकुमारीको हत्या गरी जंगलमा शव फालेर बेपत्ता भएका ७ जना अभियुक्तको पहिचान गरेबापत प्रहरी निरीक्षक कुँवरलाई चैत महिनाको सर्वोत्कृष्ट प्रहरी घोषणा गरी पुरस्कृत गरिएको कोशी प्रदेश प्रहरी प्रमुख डीआइजी राजन अधिकारीले बताए।
कोरियामा रहेका प्रेमकुमारसहित मोरङ पथरी शनिश्चरे नगरपालिका-३ संगमचोक बस्ने मुख्य योजनाकार प्रेमको आफ्नै भाइ २९ वर्षीय ढकेन्द्र बुढाथोकी र उनकी श्रीमती २५ वर्षीय सृष्टि बुढाथोकी पक्राउ परेका थिए।
मोरङकै पथरी शनिश्चरे वडा नं ३ का ४० वर्षीय केशवराज दाहाल, मिक्लाजुङ गाउँपालिका-७ लुमाङदिङ घर भई विगत ७ वर्षदेखि मोरङको उर्लाबारी नगरपालिका-५ फागुटोल बस्ने ३६ वर्षीय योगेन्द्र गौतम र उनकी श्रीमती २८ वर्षीय डेनु गौतम पक्राउ परेका छन्। दुवैजना प्रेमबहादुरका बहिनी ज्वाइँ हुन्।
कुँवरले चुनकुमारीको हत्यामा संलग्न अभियुक्त पक्राउ, लागुऔषध गाँजा कारोबारी पक्राउ र विभिन्न आपराधिक घटनामा संलग्न १८ जना फरार अभियुक्त पक्राउ गरी धरानको शान्ति सुरक्षा मजबुत बनाउन महत्त्वपूर्ण भूमिका निर्वाह गरेकाले पुरस्कृत गरिएको बताए।
