एस्काभेटरले खोतल्दा जमिनमा भासिएर बेपत्ता गाडीको केही पार्टपुर्जा भेटियो
मंगलबार वडाध्यक्ष रामकृष्ण कोइरालाले क्रेन र एक्साभेटरको सहयोगमा बेपत्ता गाडीको खोजतलास सुरु गरेका थिए ।
विश्व दैनिक |
६ जेठ, काठमाडौं । मकवानपुरको गैरीगाउँस्थित सडकमा भासिएर बेपत्ता भएको गाडीको पार्टपुर्जा फेला परेको छ ।
१९ वैशाखमा हेटौंडा उपमहानगरपालिका-१६ स्थित गैरीगाउँमा ना४च ४८३३ नम्बरको माछा बोक्ने गाडी सडकमा भासिएर बेपत्ता भएको थियो ।
२३ वैशाख र २ जेठमा खानी तथा भूगर्भ विभाग काठमाडौंको टोलीले घटनास्थल पुगेर सो क्षेत्रको अध्ययन गरेको थियो । नारायण अधिकारीको नेतृत्वमा विभागको ४ सदस्यीय टोलीले घटनास्थलको भू-बनोट भूमिगत जलस्रोत, चुम्बकीय क्षेत्र लगायत विषयमा अध्ययन गरेको थियो । अध्ययनपछि उक्त टोलीले सो स्थानको माटोको नमुना लिएर फर्केको थियो ।
मंगलबार वडाध्यक्ष रामकृष्ण कोइरालाले क्रेन र एक्साभेटरको सहयोगमा बेपत्ता गाडीको खोजतलास सुरु गरेका थिए ।
खोजतलासको क्रममा गाडीको केही पार्जपुर्जा फेला परेको उनले बताए ।
‘माथिल्लो निकायले बेपत्ता भएको गाडी खोज्न खासै चासो दिएन । गाडी फेला नपर्दा पीडितमाथि झनै पीडा थपियो । पीडितको पीडा देख्न नसकेका कारण आफ्नै सक्रियतामा ठूलो उपकरण मगाएर आजदेखि खोजतलास सुरु गरेको थिएँ । एस्काभेटरले दुई चरणमा खन्दा झन्डै १० मिटरमुनि गाडीको केही पार्टपुर्जा फेला परेको छ,’ वडाध्यक्ष कोइरालाले भने ।
जमिनमा भासिएर बेपत्ता भएको गाडीको टायर, ढोका लगायत अन्य पार्टपुर्जा फेला परेको उनले बताए । केही पार्टपुजा फेला परेसँगै गाडी भासिएकै स्थानको पहिचान भएको र पीडितलाई पनि राहत मिलेको उनको तर्क छ ।
