सासूको हत्या गरेको आरोपमा ज्वाइँ पक्राउ
तिनमाया तामाङ आफ्नै घरभित्र मझेरीमा मृत अवस्थामा फेला परेकी थिइन्
विश्व दैनिक |
८ पुस, काठमाडौं । काभ्रेमा सासुको हत्याको आरोपमा उनकै ज्वाइँ पक्राउ परेका छन् । काभ्रेको मण्डनदेउपुर नगरपालिका–१ गैरीगाउँ घिसिङ टोलकी ५२ वर्षीया तिनमाया तामाङको हत्या आरोपमा उनकै ज्वाइँ पक्राउ परेका हुन् ।
प्रहरीले अनुसन्धानका क्रममा हत्या गरेको खुलेको भन्दै मृतकका ज्वाइँ २८ वर्षीय सुकबहादुर तामाङलाई नियन्त्रणमा लिएको छ । प्रारम्भिक अनुसन्धानबाट तिनमायाको हत्या सुकबहादुरले नै गरेको खुलेको प्रहरीको दाबी छ ।
मंसिर ३० गते तिनमाया तामाङ आफ्नै घरभित्र मझेरीमा मृत अवस्थामा फेला परेकी थिइन् । जिल्ला प्रहरी कार्यालय काभ्रेका प्रमुख एसपी बसुंधरा खड़काले सुकबहादुरले नै हत्या गरेको खुलेपछि यही पुस ५ गते पक्राउ गरिएको जानकारी दिइन् ।
एसपी खड्काका अनुसार तिनमायाले काम नगर्ने भनी सधैं गालीमात्र गरिरहने र सोही दिन पनि गाली गरेकोले हत्या गरेको सुकबहादुरल स्वीकार गरेका छन् ।
उनले तिनमायालाई मुक्का प्रहार गर्नुका साथै कुटपिट गरेर टाउको थाममा ठोक्काएर हत्या गरेको बयान दिएका छन् ।
जिल्ला अदालतमा सुकवहादुरलाई पेस गरी पाँच दिन म्याद थप गरेर अनुसन्धान गरिरहेको जिल्ला प्रहरी कार्यालयले जनाएको छ ।
