प्रधानमन्त्री ओली अस्वस्थ, राजधानी बाहिरका सबै कार्यक्रम भर्चुअलबाटै

११ माघ, काठमाडौं । प्रधानमन्त्री केपी शर्मा ओलीको स्वास्थ्यमा समस्या आए पछि शुक्रबारका लागि तय भएका राजधानी बाहिरका सबै कार्यक्रमलाई भर्चुअल माध्यमबाट सम्बोधन गर्ने भएका छन् । प्रधानमन्त्री ओली चिकित्सकको सल्लाह बमोजिम दुई दिनदेखि स्वास्थ्यमा समस्या भएर आराम गरिरहेका र उपत्यका बाहिरको यात्रा नगरी भर्चुअल कार्यक्रममा जुटेका हुन् ।

प्रधानमन्त्री ओलीका शुक्रबार चार वटा कार्यक्रम तय भएका छन् ।

बिहान सवा ११ बजे पाल्पाको बगनासकाली गाउँपालिका भवन र तिनाउ गाउँपालिकाको दोभानमा नवनिर्मित प्रशासकीय भवन उद्घाटन कार्यक्रम राखिएको थियो । उक्त कार्यक्रममा प्रधानमन्त्री ओली भर्चुअल माध्यमबाट आफ्नो उपस्थिति जनाइसकेका छन् ।

भर्चुअल उद्घाटनका लागि सबै तयारी पूरा भइसकेको प्रधानमन्त्रीको सचिवालय स्रोतले जानकारी दिएको छ ।

त्यस्तै, राष्ट्रिय गौरवको आयोजना सिद्धबाबा सुरुङमार्गको ब्रेक थ्रु कार्यक्रम पनि प्रधानमन्त्रीले भर्चुअल माध्यमबाटै गर्ने भएका छन् ।

बुटवल–गोरुसिंगे सडक स्तरोन्ततिको शिलान्यास कार्यक्रम दिउँसो सवार १ बजे तय भएको छ । सो शिलान्यास कार्यक्रम पनि भर्चुअल माध्यमबाटै शिलान्यास गरिने भएको छ ।