अछामको आगलागीमा २७ घर नष्ट, ७ करोडभन्दा बढी क्षति
आगलागीबाट ७ करोडभन्दा बढीको धनमाल क्षति भएको अनुमान गरिएको छ ।
विश्व दैनिक |
२७ चैत, अछाम । अछामको बान्निगढी जयगढ गाउँपालिकास्थित जयगढ बजारमा गएराति भएको आगलागीमा २७ वटा घर जलेका छन् । जयगढ बजारमा लागेको भीषण आगो करिब ६ घण्टापछि नियन्त्रणमा आएको छ ।
स्थानीय पुष्पराज शर्माले सञ्चालन गरेको आइएमइ सेन्टरमा साँझ ७ :२० मा ग्यास सिलिन्डर विस्फोट भएर सल्केको आगो राती १२ बजेर ३० मिनेटमा नियन्त्रणमा आएको हो ।
जलेका २७ घरहरुमध्ये ११ वटामा स्थानीय व्यापारीले पसल सञ्चालन गरेका थिए ।
आगलागीबाट ७ करोडभन्दा बढीको धनमाल क्षति भएको अनुमान गरिएको छ ।
जयगढ बजारमा रहेका १० वटा ढुगा माटोले बनेको घर, १५ वटा टीनले बनेको कच्ची घर र २ वटा पक्की घर गरी २७ वटा घर तथा पसलहरू पूर्ण रुपमा जलेर नष्ट भएको छ ।
घर पसलमा रहेका ७ करोडभन्दा बढी धनमालको क्षति भएको र विस्तृत विवरण संकलनका कार्य भइरहेको जिल्ला प्रहरी प्रमख डीएसपी ईश्वरीप्रसाद भण्डारीले जानकारी दिए ।
