विश्व बैंकले नेपाललाई दिने करिब १३ अर्ब ऋण स्वीकृत
नेपालाई दिने उक्त रकम बराबरको ऋण विश्व बैंक कार्यकारी निर्देशकहरूको बोर्ड बैठकले स्वीकृत गरेको हो
विश्व दैनिक |
२८ मंसिर, काठमाडौं । विश्व बैंकले नेपाललाई दिने १० करोड अमेरिकी डलर (करिब १३ अर्ब ५० करोड रुपैयाँ बराबर) को ऋण स्वीकृत गरेको छ ।
नेपालाई दिने उक्त रकम बराबरको ऋण विश्व बैंक कार्यकारी निर्देशकहरूको बोर्ड बैठकले स्वीकृत गरेको हो ।
विश्व बैंकले नेपालमा कार्यान्वयन भइरहेको हरित, उत्थानशील र समावेशी विकास (ग्रिड) हासिल गर्ने प्रयासलाई सहयोग गर्न विकास नीति सञ्चालन (डीपीओ) अन्तर्गत यो ऋण प्रदान गरेको हो । विश्व बैंकका अनुसार डीपीओको दोस्रो शृंखलाअन्तर्गत सहयोग भएको हो ।
‘कार्यक्रममा आधारित यो डीपीओ शृंखला नेपाललाई अझै बढी उत्थानशील बनाउन तथा दिगोपन हासिल गर्न उत्प्रेरकको काम गर्ने छ, यसले नेपालीका लागि दीर्घकालीन विकासको आधार सृजना र संरक्षण गर्ने छ,’ नेपाल, माल्दिभ्स तथा श्रीलंकाका लागि विश्व बैंकका देशीय निर्देशक डेभिड सिस्लेनले भने ।
उनले यो ऋणले नेपालका वित्तीय उपकरण, जलसुरक्षा, सिँचाइ, भू(उपयोग तथा व्यवस्थापन, दिगो वन व्यवस्थापन, जलवायु एवम् विपद् सूचना प्रणालीलगायतमा उपयोग हुने बताए ।
