कप्तान पूजा महतो सम्मानित
महतोलाई खादा ओढाएर नगद २५ हजार रुपैयाँ प्रदान गर्दै सम्मानित गरेका हुन्
विश्व दैनिक |
९ पुस, काठमाडौं । यू–१९ विश्वकप क्रिकेटमा पुग्न सफल नेपाली राष्ट्रिय टिमकी कप्तान पूजा महतोलाई वीरगन्ज महानगरपालिकाले सम्मान गरेको हो।
मंगलबार वीरगन्ज महानगरपालिकाका मेयर राजेशमान सिंहले आफ्नै कार्यकक्षमा महतोलाई खादा ओढाएर नगद २५ हजार रुपैयाँ प्रदान गर्दै सम्मानित गरेका हुन्। त्यस अवसरमा यू–१९ नेपाली राष्ट्रिय टिमकी सदस्य साना प्रविनलाई पनि मेयर सिंहले सम्मानित गरे। वीरगन्ज–१३ निवासी सानालाई यसअघि गत मंसिर ९ गते मेयर सिंहले ५१ हजार रुपैयाँ प्रदान गर्दै सम्मान गरेका थिए।
गत मंसिरमा सम्पन्न यू–१९ टी–२० महिला एसिया क्वालिफायरमा थाइल्याण्ड विरुद्धको खेलमा सानाले अर्धसतक प्रहार गर्दै कप्तान पूजा महतोसँग मिलेर नेपालका लागि कीर्तिमानी साझेदारी गरेकी थिइन्।
मेयर सिंहले क्रिकेटको माध्यममार्फत मधेस र नेपालको नाम विश्वमै चिनाउन सफल भएको भन्दै कप्तान महतो र सानाको मनोबल तथा हौसला बढाउन सम्मान गरिएको बताए।
