टर्कीले अवैध बसेका पाँच नेपालीलाई गर्यो निष्काशन
टर्कीमा रहेका बेला उनीहरूले क–कस्तो काम गरेका थिए भन्ने विषयमा भने खुल्न सकेको छैन
विश्व दैनिक |
७ माघ, काठमाडौं । टर्कीले अवैधरुपमा बसेका पाँचजना नेपालीलाई निष्काशन गरेको छ। उनीहरू गत शनिबार टर्किस एयरलाइन्सको जहाजबाट काठमाडौं आइपुगेका छन्।
अवैधरुपमा बसेको थाहा पाएपछि टर्कीको प्रहरीले उनीहरूलाई केहीदिनअघि पक्राउ गरेको थियो। निष्काशित हुनेहरूमा जीवन राज आङदाम्बे,राजु सुनुवार,गोविन्द श्रेष्ठ,नरध्वज थारु र श्रीष थापा रहेका छन्।
उनीहरूको साथमा आफ्नो राहदानीसमेत थिएन। ट्राभल डकुमेन्ट बनाएर उनीहरू नेपाल आएका हुन्। उनीहरूलाई मानव तस्करकै सञ्जालले त्यहाँ अलपत्र पारेको थियो ।
लुकिछिपी बसेका उनीहरूलाई टर्कीको अध्यागमन प्रहरीले पक्राउ गरी निष्काशन गरेको हो।
टर्कीमा रहेका बेला उनीहरूले क–कस्तो काम गरेका थिए भन्ने विषयमा भने खुल्न सकेको छैन।
स्रोतका अनुसार पक्राउ परेका नेपालीहरू टर्कीलाई ट्रान्जिट बनाइ युरोप र अमेरिका छिर्ने प्रयासमा थिए। उनीहरूलाई काठमाडौंबाट मानव तस्करको सञ्जालले त्यहाँ पुर्याएको हुनसक्ने बताइएको छ।
