पूर्वकप्तान सन्दीप लामिछानेलाई क्यानले गर्यो कारबाही
जय ट्रफी एलिट कपका बेला अम्पायरको निर्णयबारे सामाजिक सञ्जालमा लेखेका थिए
विश्व दैनिक |
८ माघ, काठमाडौं । नेपाली राष्ट्रिय क्रिकेट टोलीका पूर्वकप्तान सन्दीप लामिछाने अनुशासनको कारवाहीमा परेका छन् । क्यानले उनलाई एक खेलका लागि निलम्बन गर्दै स्पष्टीकरण समेत सोधेको छ ।
लेगस्पीनर सन्दीप लामिछानेले गत साता सम्पन्न जय ट्रफी एलिट कपका बेला अम्पायरको निर्णयबारे सामाजिक सञ्जालमा लेखेका थिए । सोही विषयमा उनलाई कारवाही गरिएको क्यानका प्रवक्ता छुम्बी लामाले जानकारी दिए ।
‘जय ट्रफीका बेला सन्दीपले अम्पायरका बारेमा सार्वजनिक रूपमा सामाजिक सञ्जालमा लेखेकाले त्यो कुरा खेलाडीसँगको सम्झौताको २.७ मा उल्लेख गरिएको नियमको उल्लंघन भएकाले उनलाई एक खेलका लागि निलम्बन गरिएको हो’ छुम्बीले भने ।
अब क्यानले आयोजना गर्ने कुनै प्रतियोगितामध्ये एक खेल सन्दीपले खेल्न पाउने छैनन् । सोही विषयमा उनीसँग स्पष्टीकरण पनि सोधिएको छ ।
