प्रधानमन्त्री सशस्त्र प्रहरी दिवसको कार्यक्रममा पुगेनन्, स्वास्थ्यमा समस्या

९ माघ, काठमाडौं । प्रधानमन्त्री केपी शर्मा ओली सशस्त्र प्रहरी दिवस–२०८१ को अवसरमा हल्चोकमा आयोजित समारोहमा उपस्थित भएनन् ।

सशस्त्र प्रहरी बलले प्रधानमन्त्री ओलीलाई बुधबार सशस्त्र प्रहरी बलको हल्चोकस्थित मुख्यालयमा वर्षेनि आयोजना हुने समारोहमा प्रमुख अतिथिका रुपमा आमन्त्रण गरेको थियो ।

प्रधानमन्त्री ओलीको सचिवालयले भने स्वास्थ्यमा सामान्य समस्या देखिएपछि ओली हल्चोक नगएको बताएको छ । ‘चिसोको कारण प्रधानमन्त्रीज्यूको स्वर भासिएको छ, बोल्न पनि अफ्ठ्यारो हुने हुँदा उहाँ बालुवाटारमै आराम गरिरहनु भएको छ’, सचिवालय स्रोतले भन्यो ।

प्रधानमन्त्रीको सचिवालयबाट टुंगो लागे अनुसार, प्रधानमन्त्री ओली साढे ११ बजे हल्चोकमा उपस्थित हुने भन्दै अतिथिहरूलाई आमन्त्रण गरेको थियो । तर, अन्तिम समयमा प्रधानमन्त्री आउने कार्यक्रम रोकिएको भन्दै सशस्त्र प्रहरीले खबर पाएको छ ।

प्रधानमन्त्री उपस्थित नभएपछि सशस्त्र प्रहरी बलको समारोहमा गृहमन्त्री रमेश लेखक प्रमुख अतिथिका रुपमा उपस्थित छन् । सशस्त्र प्रहरीले समारोहमा आफूले गर्ने कार्यहरूको प्रदर्शन समेत गरिरहेको छ ।