एन्फा महिला लिगको उपाधि एपीएफलाई
उपाधिसँगै एपीएफले नगद १० लाख प्राप्त गरेको छ
विश्व दैनिक |
१६ माघ, काठमाडौं । एन्फा महिला लिगको उपाधि एपीएफ क्लबले जितेको छ । पहिलो पटक लिग, सुपर लिग हुँदै प्लेअफ फम्र्याटमा खेलाइएको महिला लिगको विभागीय डर्बी फाइनलमा बुधबार नेपाल पुलिस क्लबलाई ४–० ले पराजित गर्दै एपीएफ बनेको हो ।
एपीएफको जितमा सबिता राना मगरले २, र सुरु लिम्बु तथा अनु लामाले समान १–१ गोल गरिन् ।
पहिलो हाफमा एपीएफले पुलिसमाथि दबाब बनाउँदै गोल गर्ने केही अवसर बनाएपनि फिनिसिङ राम्रो हुन सकेन ।
३० मिनेटमा अनिता केसीले करिब १५ यार्डबाट हानेको हाफ भलिल पुलिसकी गोलकिपर उषा नाथले बचाइन् ।
दोस्रो हाफमा पनि एपीएफले सुरुवात देखि नै पुलिसमाथि दबाब बनाएको थियो ।
६४औं मिनेटमा सविता राना मगरले गोल गर्दै एपीएफलाई अग्रता दिलाईन् । उनले सरु लिम्बुले बायाँ साईडबाट दिएको क्रसमा गोल गरेकी हुन् ।
त्यसको ६ मिनेटपछि नै सुरु लिम्वुले अग्रता दोब्बर बनाइन् । ८४ औं मिनेटमा सविताले तेस्रो गोल गरिन् । इन्जुरी समयमा वैकल्पिक खेलाडी अनुले गोल गर्दै एपीएफको ४–० को जित पक्का गरिन् ।
अपराजित रहँदै च्याम्पियन बन्ने क्रममा एपीएफले पहिलो चरणको लिगमा ९ खेलमध्ये ८ मा जित र १ बराबरी गर्न सफल भयो । उपाधिसँगै एपीएफले नगद १० लाख प्राप्त गरेको छ । उपविजेता पुलिसले ५ लाख प्राप्त गरेको छ ।
