थाइल्यान्ड भ्रमण सकेर स्वदेश फर्किए प्रधानमन्त्री ओली
बिम्स्टेकको छैटौं शिखर सम्मेलनमा सहभागी हुन बैंकक पुगेका प्रधानमन्त्री ओलीले त्यहाँ रहँदा विभिन्न भेटघाटमा सरिक रहे ।
विश्व दैनिक |
२३ चैत, काठमाडौं । प्रधानमन्त्री केपी शर्मा ओली स्वदेश फिर्ता भएका छन् ।
थाइल्यान्डका प्रधानमन्त्री पे थोङ् थान् शिनावात मैत्रीपूर्ण निमन्त्रणामा मंगलबार नेपाली प्रतिनिधिमण्डलको नेतृत्व गर्दै बैंकक गएका ओली आज थाइ एयरलाइन्समार्फत काठमाडौं आइपुगेका हुन्।
प्रधानमन्त्री ओलीलाई बैंककस्थित सुवर्णभूमि अन्तर्राष्ट्रिय विमानस्थलस्थलको विशिष्ट कक्षमा थाइल्यान्डका उपप्रधानमन्त्री एवं यातायातमन्त्री सुरिया जङ्ग्राउनग्रेङकिटसहितले बिदाइ गरेका थिए।
बिम्स्टेकको छैटौं शिखर सम्मेलनमा सहभागी हुन बैंकक पुगेका प्रधानमन्त्री ओलीले त्यहाँ रहँदा विभिन्न भेटघाटमा सरिक रहे ।
उनले हिजो (शुक्रबार) भारतीय समकक्षी नरेन्द्र मोदीसँग भेटवार्ता गरेका थिए ।
प्रधानमन्त्री ओलीको भ्रमण दलमा प्रथम महिला राधिका शाक्य, परराष्ट्रमन्त्री डा आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, आर्थिक–विकास सल्लाहकार डा युवराज खतिवडा, नेपाल सरकारका मुख्यसचिव एकनारायण अर्याल, परराष्ट्र मन्त्रालयका सचिव अमृतबहादुर राईलगायत थिए ।
