पश्चिम नेपालमा चट्याङसहितको वर्षा, सतर्क रहनुहोला

हाल देशमा स्थानीय तथा पश्चिमी वायुको प्रभाव रहनुका साथै भारतको उत्तरप्रदेश आसपास रहेको न्यूनचापीय क्षेत्रको वायुको  प्रभाव परेको जल तथा मौसम पूर्वानुमान महाशाखाले जनाएको छ । जसका कारण अहिले दाङ, रोल्पा, पूर्वी रुकुम, पश्चिम रुकुम, सल्यान र जाजरकोटमा चट्याङसहित पानी परिरहेको छ। चट्याङका कारण जनधनको क्षति हुनसक्ने भन्दै आवश्यक सतर्कता अपनाउन महाशाखाले आग्रह गरेको छ ।

केही समयपछि यो प्रणाली पूर्वतिर (लुम्बिनी र गण्डकी प्रदेशको पहाडी र तराई क्षेत्र) सर्दै जाने जल तथा मौसम विज्ञान विभागले जनाएको छ ।

पछिल्लो तीन घण्टामा सबैभन्दा धेरै वर्षा दैलेखको कट्टीमा २०.६ मिलिमिटर वर्षा भएको छ । एक घण्टायता भने सबैभन्दा धेरै घोराही र सल्यान बजारमा ७.४ मिलिमिटर वर्षा मापन भएको छ ।

विभागका अनुसार डडेलधुरा,दिपायल,पोखरा,काठमाडौंलगायत देशभरीका विभिन्न सहरमा मेघगर्जन र चट्याङसहित पानी पर्ने सम्भावना छ। आज सबैभन्दा बढी तापक्रम धनगढीमा (३६ डिग्रीसम्म) र सबैभन्दा कम आज राती जोमसोममा (४ डिग्रीसम्म) पुग्नसक्ने संभावना छ।

यसैगरी कोशी प्रदेशका एकदुई स्थानमा भारी वर्षाको पनि सम्भावना रहेको छ । देशका उच्च पहाडी तथा हिमाली भू–भागका केही स्थानमा हल्का वर्षा र हिमपात हुने महाशाखाको बुलेटिनमा उल्लेख छ।
आज राती कोशी, मधेस, बागमती, गण्डकी र लुम्बिनी प्रदेशलगायत देशको पहाडी भू–भागमा आंशिकदेखि साधारणतया बदली रही बाँकी भू–भागमा मौसम सफा रहने छ ।

कोशी, मधेस, बागमती, गण्डकी, लुम्बिनी  र कर्णाली प्रदेशका केही स्थानमा  मेघगर्जन र चट्याङसहित हल्कादेखि मध्यम वर्षा हुनेछ ।  कोशी, बागमती र गण्डकी प्रदेशका उच्च पहाडी तथा हिमाली भागका एकदुई स्थानमा हल्का वर्षा र हिमपात पनि हुने उल्लेख छ ।