रेसम छाड्न अदालतको नयाँ पत्र, पत्र पठाउने विष्ट प्रहरी नियन्त्रणमा

१७ वैशाख, काठमाडौं । सर्वोच्च अदालतको आदेशको अपव्याख्या गर्दै शाखा अधिकृतले प्रहरीलाई रेसम चौधरी पक्राउ गर्न पत्र पठाएको खुलेपछि सर्वोच्च प्रशासनले अर्को पत्र पठाएको छ।

नागरिक उन्मुक्ति पार्टी (नापा) का संरक्षक रहेका चौधरीलाई थुनामुक्त गर्न अदालतले कारागारमा नयाँ पत्र पठाएको हो।
बुधवार काठमाडौंको कमलादीबाट पक्राउ परेका चौधरी डिल्ली बजार कारागार चलान भइसकेका छन्।

रेशम चौधरीलाई पक्राउ गर्न भन्दै डिल्लीबजार कारागारलाई पत्र पठाएका सर्वोच्च अदालतका शाखा अधिकृत महिमान सिंह विष्ट पक्राउ परेका छन् ।

उनलाई सर्वोच्च अदालत परिसरबाटै प्रहरीले पक्राउ गरेको हो । उनलाई जिल्ला प्रहरी परिसर भद्रकाली लगिएको छ ।

विष्टको नामबाट जारी भएको पत्र शंकास्पद र कानुनसम्मत नभएपछि विष्टलाई पक्राउ गरिएको स्रोतले बतायो ।

रेशम चौधरीलाई कैद गर्ने पत्र कानुनसम्मत नदेखिएपछि सर्वोच्च अदालतले अर्को पत्र पठाउने तयारी गरेको छ । त्यही पत्रका आधारमा रेशम चौधरीलाई थुनामुक्त गर्ने तयारी छ ।

डिल्लीबजार कारागारका जेलर पूर्णबहादुर खत्रीले सर्वोच्चबाट अर्को पत्र आउनासाथ रेशम चौधरीलाई थुनामुक्त गर्ने बताए ।