फिफाको नयाँ निर्णय : सन् २०३१ देखि महिला विश्वकपमा ४८ टोली
४८ टोली सहभागिताको नयाँ ढाँचामा अब १२ समूह रहनेछ, जसले कुल खेल संख्या ६४ बाट बढाएर १०४ पुर्याउनेछ र प्रतियोगिता एक साता थप लम्बिनेछ।
विश्व दैनिक |
जेनेभा (एजेन्सी): सन् २०३१ देखि सुरु हुने फिफा महिला विश्वकपमा सहभागी राष्ट्रहरूको संख्या ३२ बाट बढाएर ४८ पुर्याइने भएको छ। विश्व फुटबल नियामक संस्था फिफाले शुक्रबार सार्वजनिक वक्तव्यमार्फत उक्त निर्णय सर्वसम्मत पारित भएको जानकारी दिएको हो।
फिफाका अनुसार, विश्वव्यापी रूपमा महिलाको फुटबलमा आएको उल्लेखनीय प्रगतिको कदरस्वरूप यो निर्णय लिइएको हो। यसले थप राष्ट्र र खेलाडीहरूलाई उच्चस्तरीय प्रतिस्पर्धामा सहभागी हुने अवसर प्रदान गर्नुका साथै विश्वभर महिला फुटबलमा लगानी तीव्र बनाउन मद्दत गर्ने विश्वास गरिएको छ।
४८ टोली सहभागिताको नयाँ ढाँचामा अब १२ समूह रहनेछ, जसले कुल खेल संख्या ६४ बाट बढाएर १०४ पुर्याउनेछ र प्रतियोगिता एक साता थप लम्बिनेछ। फिफा अध्यक्ष जियानी इन्फान्टिनोले भने, ‘यो केवल थप १६ टोली खेलाउने कुरा मात्र होइन, यो निर्णयले सदस्य राष्ट्रहरूलाई समग्र रूपमा महिला फुटबल संरचना विकास गर्न प्रेरित गर्नेछ।’
महिला विश्वकपको सुरुआत सन् १९९१ मा १२ टोलीसहित भएको थियो। त्यसपछि सन् २०११ सम्म १६ टोलीले भाग लिए भने क्यानडा र फ्रान्समा सम्पन्न सन् २०१९ संस्करणमा २४ टोली सहभागी थिए। सन् २०२३ मा अष्ट्रेलिया र न्युजिल्यान्डद्वारा सहआयोजित प्रतियोगितामा पहिलोपटक ३२ टोली सहभागी भएका थिए। सन् २०२७ मा आगामी विश्वकप ब्राजिलमा आयोजना हुनेछ।
यसैबीच, पुरुष विश्वकप पनि सन् २०२६ देखि ४८ टोलीसहित आयोजना हुँदैछ, जुन संयुक्त राज्य अमेरिका, क्यानाडा र मेक्सिकोले संयुक्त रूपमा आयोजना गर्ने छन्।
