प्रहरीद्धारा जोरपाटीबाट बरामद ९२ लाखको ‘सुन कनेक्सन’ खोज्दै
तामाङ र धमलाको साथबाट ७७ लाख र खातीबाट १५ लाख गरी ९२ लाख रुपैयाँ बरामद
विश्व दैनिक |
११ पुस, काठमाडौं । दुई फरक ठाउँबाट मंगलबार राति ९२ लाख रुपैयाँ नगदसहित तीन जनालाई काठमाडौं उपत्यका अपराध अनुसन्धान कार्यालयको टोलीले पक्राउ गर्यो ।
अपराध अनुसन्धान कार्यालयका डीएसपी अनिल घिमिरेको कमान्डमा खटिएको टोलीले ९२ लाख रुपैयाँ नगद सहित तीन जनालाई पक्राउ गरेको थियो ।
रसुवा घर भएका जीतबहादुर तामाङ, सिन्धुपाल्चोक घर भएका रवीन धमला र सङ्खुवासभा घर भएका सन्तोष खाती पक्राउ परेका थिए ।
प्रहरीले तामाङ र धमलाको साथबाट ७७ लाख र खातीबाट १५ लाख गरी ९२ लाख रुपैयाँ बरामद गरेको थियो । उनीहरू काठमाडौंको लोलाङ र जोरपाटीबाट पक्राउ परेका हुन् ।
उनीहरूलाई अवैध सुन कारोबार हुन लागेको भन्ने सूचनाका आधारमा खटिएको प्रहरी टोलीले पक्राउ गरेको हो । यो रकम अवैध सुन खरिद बिक्रीको हुनसक्ने देखिएको अपराध अनुसन्धान कार्यालयका एसएसपी सानुराम भट्टराई बताउँछन् ।
एसएसपी भट्टराईले ‘अवैध सुन खरिद बिक्रीको रकम भएको आशंकामा अनुसन्धान गरिरहेका छौं । प्रारम्भिक अनुसन्धानमा यसको नेक्सस सुनसँग देखिन्छ,’ भने ।
पक्राउ परेका मध्ये धमलाको जोरपाटी र रसुवामा सुन पसल रहेको समेत खुलेको छ ।
