विक्की कौशल र रश्मिका मन्दाना स्टारर ‘छावा’को ट्रेलर सार्वजनिक

१० माघ, काठमाडौं । शिवाजी सावन्तको मराठी उपन्यास ‘छावा’को एक्सनप्रधान ट्रेलर सार्वजनिक भएको छ । विक्की कौशल, रश्मिका मन्दाना र अक्षय खन्नाको फिल्म ‘छावा’को एक्सनप्रधान ट्रेलर सार्वजनिक भएको छ । ३ मिनेट ८ सेकेन्डको ट्रेलरमा विक्की र अक्षय दुवैको दमदार प्रदर्शन देख्न सकिन्छ ।

यो फिल्म १४ फेब्रुअरी २०२५ मा हलमा प्रदर्शन तयारीमा छ ।

सावन्तको मराठी उपन्यास ‘छावा’मा आधारित फिल्ममा विक्की मराठा राजा छत्रपति संभाजी महाराजको भूमिकामा देखिनेछन् । लक्ष्मण उतेकर निर्देशित फिल्ममा अक्षय खन्नाले मुगल शासक औरंगजेबको भूमिका निर्वाह गरेका छन् । यो भूमिकामा उनलाई चिन्न गाह्रो छ ।

फिल्ममा आशुतोष राना, दिव्या दत्त, नील भूपलम, सन्तोष जुवेकर र प्रदीप रावतको पनि महत्वपूर्ण भूमिका छ । फिल्ममा रश्मिकाले मराठा साम्राज्यकी रानी येसुबाईको भूमिका निर्वाह गरेकी छन् । म्याडक फिल्म्सले सोशल मिडिया प्लेटफर्ममा रश्मिकाको फस्टलुक सेयर गर्दै लेखेको छ, ‘हरेक महान राजाको पछाडी एक शक्तिशाली रानी उभिन्छिन् । महारानी येसुबाईको रुपमा रश्मिका मन्दानाको परिचय स्वराज्यको गौरव हो ।’

म्याडक फिल्म्सले ‘छावा’ निर्माण गरेको हो । संगीत एआर रहमानले दिएका छन् । छायांकन सौरभ गोस्वामीले गरेका छन् भने सम्पादन मनिष प्रधानले गरेका छन् ।