त्रिशूली नदिमा ट्रक खस्यो, ३ जनाको उद्धार

४ मंसिर, काठमाडौं । पृथ्वीराजमार्ग अन्तर्गत धादिङको खयरघारीबाट लु २ ख २५० नम्बरको ट्रक त्रिशूली नदीमा खसेको छ। नवलपरासीबाट काठमाडौँतर्फ जाँदै गर्दा बिहान ५ः५५ बजे दुर्घटना भएको हो। दुर्घटनास्थलबाट तीन जना घाइतेको उद्धार गरिएको प्रहरीले जनाएको छ ।
दुर्घटनास्थलबाट ट्रक चालक नवलपरासी पश्चिमका २७ वर्षीय आशिष महतो, सहचालक २६ वर्षीय राजु थापामगर र ट्रक धनी खैरहनी नगरपालिकाका ४६ वर्षीय सुरेश गुरुङलाई उद्धार गरेको जिल्ला प्रहरी कार्यालय धादिङले जनाएको छ ।
उनीहरुलाई प्रारम्भिक उपचारका लागि मझिमटारस्थित बिहानी फार्मेसीमा पठाइएको छ ।
ट्रक अनियन्त्रित भई दुर्घटना भएको प्रहरीले जनाएको छ ।