‘नानहाई बुद्धिज्म राउन्ड टेबल’ उद्घाटनमा प्रधानमन्त्री ओली सहभागी
तीन दिनसम्म चल्ने राउण्ड टेबलमा कम्तिमा २० देशका बौद्ध धर्मका भिक्षुहरु सहभागी
विश्व दैनिक |
२८ मंसिर, काठमाडौं । काठमाडौंमा ‘नानहाई बुद्धिज्म राउन्ड टेबल’ सुरु भएको छ । याक एण्ड यति होटलमा आयोजित उद्घाटन कार्यक्रममा प्रधानमन्त्री केपी शर्मा ओली पनि सहभागी छन् ।
चीनका धर्मगुरु पन्चेन लामा समेत आउने चर्चा गरिएको थियो तर उनी कार्यक्रममा सहभागी भएका छैनन् ।
तीन दिनसम्म चल्ने राउण्ड टेबलमा कम्तिमा २० देशका बौद्ध धर्मका भिक्षुहरु सहभागी छन् ।
प्रधानमन्त्री केपी शर्मा ओलीले कार्यक्रमलाई सम्बोधन गर्दै नेपाल र चीनबीचका सम्बन्धमा बौद्ध धर्म एक चम्किलो धागोका रुपमा रहेको बताए । त्यो धागोले हाम्रा दुई राष्ट्रहरूको आध्यात्मिक र सांस्कृतिक कपडालाई एकसाथ बुन्ने उनको भनाइ छ ।
प्रधानमन्त्री ओलीले भने, ‘नेपाल र चीनबीच इतिहासदेखि नै असल मित्रता रही आएको छ । यो सम्मेलनले मैत्रीको बन्धनलाई गहिरो बनाउनेछ, आपसी सिकाइलाई प्रसारित गर्नेछ र नेपाल, चीन र त्यसभन्दा बाहिरका बौद्ध समुदायहरूबीच शान्ति, करुणा र सहयोगका शाश्वत मूल्यहरूको वकालत गर्नेछ भन्ने मैले विश्वाश लिएको छु ।’
प्रधानमन्त्री ओलीले भने एशियाको ज्योति मानिने गौतम बुद्धको पवित्र जन्मस्थान नेपालमा हुनु र उहाँका पाइलाहरूले धन्य बनेको यो भूमिले नेपाल र चीनको बौद्ध सम्पदाबीचको पुलको प्रतीक काम गरेको छ।
उनले चिनियाँ भिक्षुहरू फा जियान र जुआन जाङको नेपालको यात्राबाट नेपाली विद्वान बुद्धभद्रको चीन भ्रमणसम्म, हाम्रो साझा इतिहास ज्ञान र सिकाइको आदानप्रदानले भरिएको उल्लेख गरे ।
ओलीले चीनमा नेपाली शैलीका बौद्ध मन्दिरहरूका वास्तुशिल्प चमत्कारहरू र लुम्बिनीमा झोङ हुआ चिनियाँ बौद्ध मठको भव्यताले यो दिगो सम्बन्धको लागि शाश्वत स्मारकहरूको रूपमा खडा रहेको पनि बताए ।
