चितवनमा पत्रकारमाथि आक्रमण भएको घटनामा संलग्न एक जना पक्राउ

५ पुस, काठमाडौं । चितवनमा पत्रकारमाथि आक्रमण भएको घटनामा संलग्न भएको आरोपमा एक जना पक्राउ परेका छन् ।

पक्राउ पर्नेमा भरतपुरकै दीपक सेडाईं हुन्। जिल्ला प्रहरी कार्यालय चितवनका डीएसपी भेषराज रिजालले उनलाई बिहीबार राति नियन्त्रणमा लिइएको बताए ।

उनी राष्ट्रिय स्वतन्त्र पार्टी (रास्वपा) निकट रहेका बताइएको छ ।

१८ मंसिरमा सहकारीको रकम ठगी प्रकरणमा बयानका लागि रास्वपाका सभापति तथा पूर्वगृहमन्त्री रवि लामिछानेलाई चितवन लगिएको थियो ।

सो क्रममा उनका समर्थकहरुले चितवनमा प्रदर्शन गरेका थिए । त्यतिबेला रिपोर्टिङमा खटिएका पत्रकार सन्तोष देउजामाथि आक्रमण भएको थियो ।

डीएसपी रिजालले घटनामा संलग्न अन्य व्यक्तिको पनि खोजी जारी रहेको बताए ।