च्याट जीपीटी र एआई कुनै चित्रगुप्त होइन : प्रधानमन्त्री ओली
हामी त्यसको प्रयोग गरेर बाँकी दुनियाँ जस्तै अघि बढ्न सक्छौं
विश्व दैनिक |
३ माघ, काठमाडौं । प्रधानमन्त्री केपी शर्मा ओलीले च्याट जीपीटी, एआई अब नेपालका लागि नयाँ कुरा नभएको बताएका छन् । उनले भने यसको प्रयोगबाट नेपाल अघि बढ्नु पर्छ ।
प्रधानमन्त्री ओलीले बिहीबार पोखरा स्वास्थ विज्ञान प्रतिष्ठानको पहिलो दीक्षान्त समारोहलाई सम्बोधन गर्ने क्रममा यस्तो बताएका हुन् ।
‘च्याट जीपीटी पनि नयाँ कुरा होइन । एआई पनि नयाँ कुरा होइन । हामी त्यसको प्रयोग गरेर बाँकी दुनियाँ जस्तै अघि बढ्न सक्छौं,’ प्रधानमन्त्री ओलीले भने, ‘त्यसका खतरनाक पक्षहरू छन् । ती कुराहरूमा पनि हामीले ध्यान दिनुपर्छ । त्यसले अह्राएको गर्छ, साँचो र झूटो धेरै छुट्याउँदैन । त्यो कुनै चित्रगुप्त होइन । अह्राएको गर्ने भएकाले गलत अह्रायो भने गलत गर्छ । त्यो बुझ्न सतर्क हुनुपर्छ ।’
आइटी र प्रविधिको क्षेत्रमा सरकारले जोड दिएर काम गरिरहेको उल्लेख गर्दै उनले भने, ‘अब हामी उठ्न नसक्ने कुनै कारण छैन । अब हामीले प्राविधिक शिक्षामा जोड दिनेछौँ । आईटीमा जोड दिनेछौँ । अब हाम्रा लागि नयाँ कुरा होइन ।’
