कोशीका पूर्व मुख्यमन्त्री उद्धव थापामाथि कुटपिट, दुई जना पक्राउ

थापा चढेको गाडीले विद्युत् कर्मचारी सवार गाडीलाई ओभरटेक गरेको विषयमा विवाद भएको


६ माघ, काठमाडौं । कोशी प्रदेशका पूर्व मुख्यमन्त्री उद्धव थापामाथि कुटपिट भएको छ। कुटपिटबाट थापाको देब्रे आँखाको माथिल्लो भागमा चोट लागेको छ। बिर्तासिटी हस्पिटल बिर्तामोडमा उपचारपश्चात् उनी घर फर्किसकेका छन्।

शनिबार साँझ करिब ६ बजे नेपाल प्रेस युनियन झापाले दोमुखामा आयोजना गरेको वार्षिक साधारण सभाबाट फर्किँदै गर्दा कनकाई नगरपालिकास्थित जामुनबारी चोकमा उनीमाथि कुटपिट भएको हो। बा१झ ६५३ नम्बरको गाडीमा बिर्तामोड घर फर्किँदै गरेका थापामाथि बा१झ १८७० नम्बरको विद्युत् प्राधिकरण सुरुङ्गाको गाडीमा सवार कर्मचारीहरूले कुटपिट गरेको जिल्ला प्रहरी कार्यालय झापाका डीएसपी कृष्णकुमार चन्दले जानकारी दिए।

नेपाली कांग्रेस कोशी प्रदेश संसदीय दलका नेतासमेत रहेका थापा चढेको गाडीले विद्युत् कर्मचारी सवार गाडीलाई ओभरटेक गरेको विषयमा विवाद भएको थियो। सोही क्रममा उनीहरूले थापामाथि कुटपिट गरेको हो। यता पक्राउ पर्नेहरूमा कर्मचारीहरू शिवसताक्षी नगरपालिका ११ का ४९ वर्षीय भक्तबहादुर कटवाल र कनकाई नगरपालिका ३ का ४२ वर्षीय पृथ्वी श्रेष्ठलाई इलाका प्रहरी कार्यालय बिर्तामोडमा राखिएको डीएसपी चन्दले बताए।

Leave a Reply

Your email address will not be published. Required fields are marked *