विश्वकपमा नेपालले मलेसियालाई हरायो
नेपालका लागि पूजाले ४ र रचना चौधरीले ३ विकेट लिए

११ माघ, काठमाडौं । नेपालले आइसिसी यु १९ महिला विश्वकपमा आयोजक टोली मलेसियामाथि सहज जित दर्ता गरेको छ । मलेसियाको जोहार क्रिकेट एकेडेमी मैदानमा आज शुक्रबार भएको प्लेअफमा नेपालले मलेसियालाई ७ विकेटले स्तब्ध पारेको हो ।
मलेसियाले दिएको ४६ रनको लक्ष्य नेपालले ११ ओभरमा ३ विकेटको क्षतिमा पूरा गरेको थियो।
नेपालका लागि कप्तान पूजा महतोले अलराउन्डर प्रदर्शन गरेकी थिइन्। उनले अविजित २३ रन बनाएर नेपाललाई जित दिलाउन सफल भएकी थिइन्।
पूजा र रचना चौधरीको उत्कृष्ट बलिङमा मलेसिया १६.५ ओभरमै अलआउट भएको थियो। मलेसियाका लागि नुरीमानले सर्वाधिक १५ रन बनाइन्। अन्य खेलाडीले दोहोरो अंकको रन जोड्न सकेनन्।
नेपालका लागि पूजाले ४ र रचना चौधरीले ३ विकेट लिए। त्यस्तै रिया शर्मा र सीमा केसी १–१ विकेट लिए। नेपाल यसअघि नै समूहचरणबाट बाहिरिसकेको छ।
नेपाल समूह डी र मलेसिया समूह ए का पराजित टाेली हुन् । तर दुवै टोली सुपर ६ बाट बाहिरिएकाले प्लेअफमा भिडेका हुन् । नेपाल यसअघि समूहमा बंगलादेश, स्कटल्यान्ड र अस्ट्रेलियासँग पराजित भएको थियो। उता मलेसिया भारत, श्रीलंका र वेस्ट इन्डिजसँग पराजित भएको थियो।