रुघाखोकी लाग्दा जुन आशले आईसीयूका तस्वीर देखाइयो, त्यो पूरा हुँदैन : प्रधानमन्त्री

१४ माघ, काठमाडौं । प्रधानमन्त्री केपी शर्मा ओलीले आफूलाई सामान्य रुघाखोकी लाग्दा पनि भेन्टिलेटरभित्र अक्सिजन माक्स लगाएको तस्वीर देखाइएको भन्दै त्यसतर्फ गुनासो गरेका छन् ।

प्रधानमन्त्री ओलीले आइतबार भक्तपुरको सूर्यविनायक नगरपालिकाको प्रमुख प्रशासकीय भवन उद्घाटन कार्यक्रमलाई सम्बोधन गर्दै यस्तो गुनासो गरेका हुन् ।

केही दिनदेखि उनि स्वास्थ्य समस्या भएर निवासमै आराम गरिरहेका थिए । उनलाई चिकित्सकहरूले लामो यात्रा नगर्न आग्रह गरेपछि गत शुक्रबार भर्चुअल माध्यमबाटै सिद्धबाबा सुरुङको ब्रेक थ्रु लगायतका कार्यक्रम उद्घाटन गरेका थिए ।

प्रधानमन्त्रीको आफू सामान्य बिरामी भएको र अहिले पनि कमजोर नै रहेको भनाइ छ ।

प्रधानमन्त्री ओलीले केहीदिनपछि सार्वजनिक कार्यक्रममा भने, ‘मेरो अलि अलि स्वास्थ्य राम्रो छैन । रुघाखोकी अलिक नराम्रोसँग लाग्यो । तर, मलाई रुघाखोकी, हाच्छ्युँ गरेको देख्यो भने आईसीयूमा भेन्टिलेटर लगाएको वा अक्सिजन माक्स लगाइरहेको फोटो आइहाल्छ ।’

उनले जुन आशले आफ्नो त्यस्ता तस्वीर देखाइएको हो त्यो पुग्ने अवस्था नभएको पनि जिकिर गरे ।

प्रधानमन्त्री ओलीले ‘तपाईंहरूले पनि देख्नुभयो हाला । सुन्नुभयो होला । मलाई रुघा लागेको थियो । अहिले पनि राम्रै निको भइसकेको छैन । एन्टिबायोटिक खाँदा अलिक कमजोर बनाएको छ, कुरा त्यत्ति हो । जे आशले आईसीयूमा देखाउँछन्, त्यो आश पुग्नेवाला छैन,’ भने ।