संसदमा रास्वपाले आफैं समय तोकेर गरे बैठक बहिष्कार

१८ माघ, काठमाडौं । राष्ट्रिय स्वतन्त्र पार्टी (रास्वपा) का सांसदहरुले संसद बहिष्कार गरेका हुन् । संसदको पाँचौं अधिवेशनको पहिलो दिन रास्वपा सांसदले समय तोकेरै १५ मिनेट संसद बहिष्कार गरेका हुन् ।

संसदको पहिलो बैठकको सुरुमै केहि कुरा राख्ने भन्दै उठेका रास्वपा सांसदहरुलाई सभामुले बोल्ने समय नदिएपछि उनीहरुले १५ मिनेटका लागि बैठक बहिष्कार गरेका थिए ।

सभामुख देवराज घिमिरेले बैठक प्रारम्भ गर्दै राष्ट्रपतिबाट संसद आह्वान भएको पत्र वाचन गर्न लाग्दा रास्वपाका सांसदहरु उभिएका थिए । सभामुख घिमिरेले उनीहरुलाई पटक पटक बस्न आग्रह गरे । ‘दलीय आधारमा समय निर्धारण गरेर दलको प्रतिनिधिको हिसाबले पनि विचारहरु राख्ने व्यवस्था गरेका छौं । माननीयहरुले त्यही कार्यसूचीलाई साथ दिनुहुन आग्रह गर्दछु,’ सभामुख घिमिरेले भने । उनको आग्रहलाई रास्वपा सांसदले अस्विकार गरे ।

रास्वपाले सुरुमा आफ्ना धारणा राख्न माग गरिरहेका थिए । तर सभामुख घिमिरेले दलीय व्यवस्था अनुसार निर्धारण गरेको समयमा मात्रै धारणा राख्न पाउने ध्यानाकर्षण पटक–पटक गराए ।राष्ट्रपति कार्यालयका पत्रहरु पढेर सभामुख घिमिरेले सुनाउने बताएसँगै रास्वपाका सांसदहरुले टेबल ठोकेर विरोध जनाए । रास्वपाका सांसदहरुले विरोध जारी रहँदै सभामुख घिमिरेले सभा सञ्चालन गरे ।

सभामुख घिमिरेले सभा सञ्चालन गरेपछि रास्वपाका सांसदहरुले सदन बहिष्कार गरे । १५ मिनेटका लागि भन्दै उनीहरु बैठक कक्षबाट बाहिरिए । त्यसपछि सभामुख घिमिरेले प्रधानमन्त्री केपी शर्मा ओलीलाई सम्बोधनको समय दिए ।

प्रधानमन्त्री ओलीले बोल्न सुरु गर्दा रास्वपाका सांसदहरु बैठक कक्षमा थिएनन् । प्रधानमन्त्रीले करिब १५ मिनेट बोलिसक्दा रास्वपाका सांसदहरु पनि बैठक कक्षमा प्रवेश गरेर आ–आफ्नो स्थानमा बसे ।