सशस्त्र प्रहरी इन्स्पेक्टर महत मृत्यु प्रकरण, अर्का इन्स्पेक्टरविरुद्ध प्रहरीमा जाहेरी

१२ फागुन, काठमाडौं । सशस्त्र प्रहरी बलमा कार्यरत इन्स्पेक्टर सन्तोषी महत मृत भेटिएकी छन् । उनी पोखरास्थित हुल तथा दंगा व्यवस्थापन तालिम शिक्षालय लामापाटनमा बेसिक तालिम लिइरहेकी थिइन् । सिन्धुपाल्चोक घर भएकी महत १७ औ बेसिक (२०८१) की इन्स्पेक्टर हुन् । इन्स्पेक्टरको बेसिक तालिम गरिरहेकी उनी ब्यारेकको गत शनिबार राति महिला शौचालयको नजिकको बिममा झुन्डिएको अवस्थामा मृत फेला परेकी थिइन् ।

सशस्त्र प्रहरी बल नेपालका प्रवक्ता कुमार न्यौपानेका अनुसार इन्स्पेक्टर महतको मृत्यु प्रकरणमा अनुसन्धान गर्नका लागि छानविन समिति गठन भएको छ । उनको मृत्यु प्रकरणमा जिल्ला प्रहरी कार्यालय कास्कीमा १६ औं बेसिकका एकजना इन्स्पेक्टरविरुद्ध आत्महत्या दुरुत्साहनको किटानी जाहेरी दर्ता भएको छ ।

उनको शव पोष्टमार्टमको लागि त्रिवि शिक्षण अस्पतालमा ल्याइएको छ । घटना अनुसन्धान गर्न सशस्त्र प्रहरी बल प्रधान कार्यालयले डीआईजीको नेतृत्वमा छानविन समिति गठन गरेको छ । एकेडेमीका डीआईजी लक्ष्मण सिंहको नेतृत्वमा समिति गठन गरिएको छ । जसमा कानुन महाशाखाको प्रतिनिधि तथा अन्य गरी पाँचजनाको समिति गठन भएको हो ।

सशस्त्र प्रहरी प्रवक्ता न्यौपाने भन्छन्,ुघटनाको विषयमा जाहेरी दर्ता भइसकेको र घटनाको विषयमा नेपाल प्रहरीले नै अनुसन्धान अगाडि बढाएको छ । सशस्त्र प्रहरी जवान र असई हुँदै उनी इन्स्पेक्टर भएकी थिइन् । उनले यसैवर्ष इन्स्पेक्टरमा नाम निकालेकी थिइन् ।

निकै मेहनेति स्वभावकी महत के कारणले आत्महत्या गर्न पुगिन् छानविन समितिले निष्कर्ष निकाल्नेछ । २०७२ सालमा सशस्त्रकै सिपाहीमा भर्ना भएकी उनले २०७८ सालमा असईमा नाम निकालेकी थिइन् । त्यसपछि अहिले २०८१ सालमा इन्स्पेक्टरमा नाम निकालेर तामिल सुरू गरेकी थिइन् ।

मृतक महत ती इन्स्पेक्टरसँग प्रेमसम्बन्धमा रहेको बताइएको छ । सम्बन्धमा समस्या आएपछि उनले आत्महत्या गरेको हुनसक्ने अनुमान गरिएको छ । उनलाई आत्महत्या गर्न बाध्य पारेको कसुरमा उती इन्स्पेक्टरविरुद्ध पीडितका परिवारले जिल्ला प्रहरी कार्यालय कास्कीमा जाहेरी दिएका हुन् ।