प्रसाईंसँगै भागेका दुई जना फेला, भन्छन् दाइलाई बीएण्डसीमा छाडेर आएका थियौं

२२ चैत, काठमाडौं । शुक्रबार तीनकुनेमा भएको राजावादीको हिंसात्मक प्रदर्शनपछि भागेका दुर्गा प्रसाईं सिन्धुली हुँदै झापासम्म पुगेको प्रहरीले फेला पारेको छ । प्रसाईंसँगै भागेका दुई जनालाई प्रहरीले पक्राउ गरेको छ ।

प्रहरी स्रोतका अनुसार, पक्राउ पर्नेमा गाडी धनी मुकुन्द दाहाल र चालक ईश्वर विक छन् । प्रसाईं चढेको गाडीको फोटो सार्वजनिक भएपछि प्रहरीले यसका सञ्चालकलाई ट्र्याक गरेको थियो ।

त्यसक्रममा दाहाललाई इटहरीबाट उपत्यका अपराध अनुसन्धान कार्यालय, काठमाडौंको टोलीले समातेको प्रहरी उच्च स्रोतले बतायो । विक पनि त्यहीँबाट समातिएका थिए ।

प्रहरीलाई पेलेर गाडी हुइँक्याउँदै तीनकुनेबाट निषेधित क्षेत्र तोडेका प्रसाईंलगत्तै सुरक्षाकर्मीको नियन्त्रणमा आएका थिए । उनको बागमती प्रदेश ०२७ च ३८४७ नम्बरको गाडीसमेत प्रहरीले बरामद गरेको थियो ।

तर, प्रसाईंलाई प्रहरी कार्यालयतिर ल्याउने क्रममा भिड बढ्न थाल्यो र उनलाई सुरक्षागार्ड दिपक खड्का आफूतिर तान्न सफल भएका थिए । त्यसपछि प्रसाईं तीनकुनेबाट पेरिसडाँडा जाने बाटोमा सटरभित्र लुकेका थिए ।

प्रसाईं सटरबाट निस्किएर अपराह्न ३ः२६ बजे बीएबी ४२०८ नम्बरको गाडीमा पेरिसडाँडा जाने बाटो हुँदै प्रदर्शनस्थलबाट निस्किएका थिए । त्यसपछि फरार भएका उनको यो गाडी प्रहरीले मोरङमा फेला पारेको छ । गाडीमा बसेका दुई जनालाई भने प्रहरीले इटहरीबाट पक्राउ गरेको छ ।

‘शुक्रबार बेलुकीसम्म उनलाई समात्ने भन्ने स्पष्ट आदेश थिएन, त्यसैले उनले मौका पाए’, एक अनुसन्धान अधिकृत भन्छन् प्रसाईं चढेको गाडी भने दाहालले मोरङस्थित आफ्नो ससुरालीमा लगेर राखेको पाइएको प्रहरी स्रोतले बताएको छ । ‘त्यो गाडी पनि बरामद गरेका छौं’, स्रोतले भन्यो ।

काठमाडौं ल्याएपछि पक्राउ परेका दाहाल र विकले आफूहरूले प्रसाईंलाई त्यहाँबाट सिधै झापा लगेको बयान दिएका छन् । ‘बिहान साढे ५ बजेतिर उनीहरूले बिर्तामोडमा रहेको बीएण्डसी मेडिकल कलेजमा पुर्‍याएको भनेका छन्’, स्रोतले भन्यो, ‘त्यहाँ छाडेर दुई जना इटहरीतिर फर्किएको बयान दिएका छन् ।’

अस्पतालमा कार्यरत एक जना कर्मचारीले समेत प्रसाईंलाई त्यहाँका गार्डहरूले ‘स्ल्युट’ गरेको देखेको भनेका छन् ।

पक्राउ परेका दुई जनालाई भने काठमाडौं ल्याएर अपराध अनुसन्धान कार्यालयले जिल्ला प्रहरी परिसर, भद्रकालीको जिम्मा लगाएको छ ।

प्रहरीले दुवै जनालाई प्रहरीले मुलुकी अपराध संहितामा रहेको आपराधिक उपद्रव गर्न नहुने सम्बन्धी कसुरमा अनुसन्धान गर्न अदालतबाट म्याद लिएको छ ।