उद्योगको बक्यौता रकम उठाउन खोज्दा पदबाट बर्खास्त गरियो : कुलमान

२२ चैत, काठमाडौं । नेपाल विद्युत् प्राधिकरणको कार्यकारी निर्देशक पदबाट बर्खास्तीमा परेपछि कुलमान घिसिङले पहिलोपटक आफ्नो धारणा सार्वजनिक गरेका छन् । कुलमान घिसिङले सार्वजनिक संस्थाको बक्यौता रकम उठाउन खोज्दा सरकारले आफूलाई पदबाट बर्खास्त गरेको दावी गरेका छन्।

शुक्रबार पत्रकार सम्मेलन गर्दै घिसिङले डेडिकेटेड र ट्रंक लाइनको बक्यौता महशुल उठाउन खोज्नु नै पदबाट हट्नुपर्ने मुख्य कारण बनेको बताए। उनले बक्यौता नउठाउने गरी आएका दबाब र आग्रहलाई स्वीकार नगर्दा पदबाट हट्नुपर्ने अवस्था आएको दावी गरे।

पत्रकार सम्मेलनमा बोल्दै घिसिङले आम नागरिकको रुपमा आफूले गर्ने काममा कहिल्यै कमी नहुने बताएका छन् ।

‘सरकारको निर्णयले काम गर्ने कर्मचारीलाई हतोत्साहित बनायो, म जिम्मेवार नागरिकका रुपमा कहिल्यै कम हुने छैन,’ उनले भनेका छन् ।

उनले आफूमाथि ऊर्जा, जलस्रोत तथा सिंचाईमन्त्री दिपक खड्काले अनावश्यक नैतिक प्रश्न उठाउने काम गरेको पनि आरोप लगाएका छन् ।

‘प्राधिकरणलाई बक्यौता असुल गर्ने काममा अवरोध सिर्जना गरियो, विद्युत्मा आत्मनिर्भर बनाउने मेरो प्रयास थियो । ममाथि वर्तमान ऊर्जामन्त्रीबाट अनावश्यक नैतिक प्रश्न उठाउने काम भयो,’ घिसिङले भनेका छन् ।