एसीसी पुरुष अन्डर–१९ एसिया कपमा नेपाल र श्रीलंका भीड्दै

१४ मंसिर, काठमाडौँ । एसीसी पुरुष अन्डर–१९ एसिया कपमा नेपालले आफ्नो पहिलो खेल आज श्रीलंकासँग खेल्दैछ।
यूएईको शारजाह क्रिकेट स्टेडियममा खेल नेपाली समय अनुसार बिहान पौने ११ बजेबाट सुरू हुने छ ।दुबै टोली जित हात पार्दै प्रतियोगितामा सुखद् सुरूआत गर्ने लक्ष्यमा हुने छन् । बलियो मानिएको श्रीलंकालाई हराउन नेपालले उत्कृष्ट प्रदर्शन गर्नुपर्ने छ। शक्ति गौचनको प्रशिक्षणमा नेपाली टोली एसिया कपमा उत्रन लागेको हो। नेपालले आफ्नो दोस्रो खेल पर्सी आइतबार बंगलादेश र तेस्रो खेल मंगलबार अफगानिस्तानसँग खेल्ने तालिका छ।
प्रतियोगितामा एसियाका आठ देश सहभागी छन्। नेपाल रहेको समूह बी मा श्रीलंका, बंगलादेश र अफगानिस्तान छन् । समूह ए मा भारत, पाकिस्तान, जापान र यूएई छन्।
यसैबीच आजै हुने अर्को खेलमा अफगानिस्तान र बंगलादेश भिड्ने छन्। बंगलादेश साविक बिजेता पनि हो।