१७ वर्षीया किशोरीको हत्यापछि लो-बेडभित्र लुकाइयो शव
प्रहरीले मोबाइललाई केन्द्रित गरेर अनुसन्धान अघि बढायो
विश्व दैनिक |
४ पुस, काठमाडौं । चन्द्रागिरि नगरपालिका–१० सतुगंल खरिबोट बस्ने १७ वर्षीया किशोरी सरिता तामाङ हराएको भन्दै प्रहरी वृत्त थानकोटमा निवेदन पर्यो ।
उनका दाई नवीन रुम्बा तामाङले २९ मंसिरको राति १२ बजेदेखि हराएको भन्दै १ पुसमा प्रहरीमा निवेदन दिएका थिए । तामाङ हराएको भन्दै निवेदन परेपछि प्रहरीले खोजी सुरु गरेको थियो । खोजी गर्ने क्रममा ३ पुस दिउँसो ३ बजेतिर तामाङको शव फेला पर्यो ।
चन्द्रागिरि–१० स्थित वीरेन्द्र श्रेष्ठको घरको भुईँ तलाको कोठाभित्र प्रहरीले उनको शव फेला पारेको हो । सरिता सोही घरमा भाडामा बस्ने गरेकी थिइन् ।
उनका आफन्तले मृत किशोरी सरिताले मोबाइल पनि प्रयोग गर्ने गरेको बताएका थिए । त्यसपछि प्रहरीले मोबाइललाई केन्द्रित गरेर अनुसन्धान अघि बढायो ।
एक अनुसन्धान अधिकृतले मोबाइल पत्ता लगाएपछि अभियुक्तको पहिचान गर्न सफल भएको बताए । परिसर काठमाडौंका प्रवक्ता नवराज अधिकारीका अनुसार सरिताको हत्या आरोपमा गजुरी–३ घर भई काठमाडौं–१४ खड्कागाउँ बस्दै आएका २४ वर्षीय विश्वास तामाङलाई पक्राउ गरिएको छ ।
एक अनुसन्धान अधिकृतले अनुसन्धानका क्रममा मृतक सरिताको मोबाइल विश्वासको कोठामा भेटियो । त्यसपछि विश्वासले घटनाबारे स्वीकारेको बताए ।
विश्वास र सरिता नाताभित्रकै व्यक्तिहरूसमेत हुन् । उनलाई कोठाबाटै बुधबार राति साढे ९ बजे पक्राउ गरिएको हो । उनले हत्या स्वीकार गर्दै सामान्य विवाद हुँदा भवितव्य परेर घटना भएको दाबी गरेका छन् । सरिताको मृत्यु भएपछि लो–बेड (सुत्ने खाट) भित्र शव लुकाइएको थियो ।
प्रहरीले आज काठमाडौं जिल्ला अदालतबाट म्याद लिएर कर्तव्य ज्यानको कसुरमा अनुसन्धान अघि बढाइने जनाएको छ ।
