रुखबाट लडेर मृत्यु भएको भनिएका दाङका कुसारी अन्तत गोलि प्रहार बाट मृत्यु, घटनामा सम्लग्न २ जना पक्राउ
विश्व दैनिक |
६ माघ, काठमाडौं । जंगलमा रुखबाट लडेर मृत्यु भएको भनिएका दंगिशरण गाउँपालिका–२ कौवाधारीका २५ वर्षीय प्रेमबहादुर कुसारी अन्तत गोलि प्रहार बाट मृत्यु भएको पाइएको छ ।
भेरी अस्पताल बाँकेमा पोस्टमार्टम गरिसकेपछि मृतक कुसारीको शव घरमा ल्याएर सद्गत् गराउने तयारी गरिरहेका बेला जिल्ला प्रहरी कार्यालय दाङले पुन कुसारीको शव पोस्टमार्टमका लागि भेरी अस्पताल नै पठायो । शव घरमा ल्याएर सद्गत् गराउने तयारी गरिरहेका बेला कुसारीको घरमै प्रहरी पुगेको थियो ।
कुसारीको मृत्यु सामान्य नरहेको सूचना पाएको प्रहरीले उक्त शव पुनः पोस्टमार्टमका लागि भन्दै भेरी अस्पताल नै पठायो । दोस्रो पोस्टमार्टममा भने कुसारीको तिघ्रामा गोली (छर्रा) भेटिएको जिल्ला प्रहरी कार्यालय दाङले बताएको छ ।
प्रहरीले पाएको पूर्वसूचना सही भएपछि थप अनुसन्धान अघि बढाएको थियो । कुसारीमाथि गोली प्रहार भएको आरोपमा प्रहरीले अहिले २ जनालाई पक्राउ गरेको छ ।पक्राउ पर्नेहरूमा दंगिशरण–२ कै २२ वर्षीय छविलाल डाँगी र सोही ठाउँका २७ वर्षीय पुष्पलाल बस्नेत छन् ।
डाँगीलाई ५ माघमा नेपालगञ्जबाट र सोही दिन बस्नेतलाई तुलसीपुरबाट पक्राउ गरिएको हो । पक्राउ परेकाहरुविरुद्ध दाङ जिल्ला अदालतबाट ज्यानसम्न्धी कसुरमा १० दिनको म्याद लिएर अनुसन्धान अघि बढाइएको रोकायले बताए ।
अनुसन्धानको क्रममा उनीहरू तीनै जना सिकार खेल्न गएको खुलेको छ । सो क्रममा जंगली जनावरलाई हानेको गोली कुसारीलाई लागेको प्रहरीको प्रारम्भिक अनुसन्धानबाट खुलेको छ । तर पक्राउ परेकाहरूले भने कुसारी लड्दा आफैंले बोकेको भरुवा बन्दुकको गोली लागेको दाबी गर्दै प्रहरी समक्ष बयान दिएका छन् ।
सिकार खेल्न प्रयोग गरिएको एक थान भरुवा बन्दुक समेत प्रहरीले दंगिशरण–२ कै राजाकोट सामुदाष्कि वनबाट फेला पारेको छ ।
