जोरपाटीमा खुकुरी प्रहारमा संलग्न ४ जनाविरुद्ध ज्यान मार्ने उद्योगमा मुद्दा दर्ता

६ माघ, काठमाडौं । जोरपाटी बाहुनधारामा रहेको स्नुकर हाउसमा खुकुरी प्रहार भएको घटनामा संलग्न चार जनालाई पक्राउ गरी कारबाही अघि बढाइएको छ
पक्राउ पर्नेमा पाँचथर घर भएका २३ वर्षीय रोहन बुढाथोकी, ताप्लेजुङ घर भएका २३ वर्षीय लोटस आङबुहाङ, भोजपुर घर भएका २५ वर्षीय बिहान राई र धनकुटा घर भएका २६ वर्षीय विधान राईविरुद्ध ज्यान मार्ने उद्योगमा कारबाही अघि बढाइएको छ । पक्राउ परेकाहरु प्रहरी वृत्त बौद्धको हिरासतमा रहेका छन् ।
१६ पुसमा ङेमा दुर्जे लामाले सञ्चालन गरेको स्नुकर हाउसमा हो–हल्ला गरेको भन्दै सञ्चालक ङेमाले उनीहरूलाई स्नुकर हाउसबाट बाहिर पठाएका थिए । सोही दिन साँझ साढे ६ बजेतिर चार जनालाई खुकुरी प्रहार भएको थियो ।खुकुरी प्रहारबाट अजयको बायाँ हात र टाउकामा र हुइसेरको दायाँ हातमा र राजुको शरीरको विभिन्न भागमा चोट लागेको थियो ।
अजयको राष्ट्रिय ट्रमा सेन्टरमा र हुइसेरको नेपाल अर्थोपेडिक अस्पताल नारायणटारमा उपचार गराइएको थियो ।
प्रहरीले पक्राउ परेकाहरूबाट घटनामा प्रयोग भएको खुकुरी समेत बरामद गरेको थियो ।