अमेरिकामा नयाँ वर्ष मनाइरहेको ठाउँमा ट्रकले किच्दा १५ जनाको मृत्यु

१८ पुस, काठमाडौं । अमेरिकाको लुइसियाना राज्यको न्यु अर्लिन्स सहरमा नयाँ वर्ष मनाइरहेका मानिसहरुलाई ट्रकले किच्दा १५ जनाको मृत्यु भएको छ।

जनवरी १ मा नयाँ वर्ष मनाउँदै गरेका मानिसलाई लक्षित गरी एक व्यक्तिले पिकअप ट्रक चलाएको अन्तर्राष्ट्रिय सञ्चारमाध्यमहरुमा उल्लेख छ । उक्त घटनामा १५ जनाको मृत्यु भएको छ भने दर्जनौं घाइते भएका छन् ।

सहरको सबैभन्दा व्यस्त बोर्बोन स्ट्रिटमा हजारौं मानिसहरू उत्सव मनाइरहेका थिए। अचानक एउटा गाडी भीडलाई कुल्चिँदै अगाडि बढ्यो । न्यु अर्लिन्समा राती सवा ३ बजे उक्त घटना भएको हो।

यसपछि आक्रमणकारी पिकअप ट्रकबाट बाहिर निस्किएका र मानिसहरूमाथि अन्धाधुन्ध गोली चलाउन थालेका जनाइएको छ। जवाफी कारबाहीमा प्रहरीले पनि गोली चलाउँदा आक्रमणकारीको मृत्यु भएको छ। भिडन्तमा दुई प्रहरी पनि घाइते भएका छन् ।