एमालेले कांग्रेसबाट खोस्यो कपिलवस्तुको शुद्धोधन–१ वडाध्यक्ष

१७ मंसिर, काठमाडौं । कपिलवस्तुको शुद्धोधन गाउँपालिका–१ मा नेकपा एमाले विजयी भएको छ । एमाले उम्मेदवार ताहिर मुसलमान १ हजार १ सय ५० मतसहित विजयी भएका हुन् । उनका निकटतम् प्रतिस्पर्धी नेपाली कांग्रेसका दिनेश कुमार यादवले १ हजार ७६ मत प्राप्त गरे ।
त्यस्तै, जनमत पार्टीका उम्मेदवार सीताराम पटेल ४ सय २३ मतसहित तेस्रो भएका छन् । यसअघि यो क्षेत्रमा नेपाली कांग्रेसका उम्मेदवार तिलकराम यादव निर्वाचित भएका थिए । त्यतिबेला उनी १ हजार ३२ मतले विजयी हुँदा नेकपा एमालेका अब्दुल मोजीब खाँले ८ सय ८९ मत मात्रै पाएका थिए । यस वडामा २०७९ का बिजेत वडाध्यक्ष तिलकराम यादवको मृत्यु भएको थियो ।